Þú meinar það......

Nýtt ár og rúmlega það....!

Mon, 25 Jan 2010 02:45:55 GMT

Jæja....nú er nýja árið gengið í garð og gott betur, kominn alveg 25. janúar. Það er nú margt og mikið búið að gerast á þessu nýja ári og restinni af því síðasta. Ég vill meina að þetta ár verði gott ár hjá mér þar sem talan 2010 er talan mín með smávægilegum lagfæringum. Þannig sem ég lít á þessa tölu út frá stjörnuspekinni...kannski er þetta bara mín speki (veit það ekki) en þá er 2+1=3 og hefur 3 alltaf verið mín tala. Ég nota hana mjög mikið og ef mér stæði til boða að taka 2,3 eða 4 smákökur af disk....þá myndi ég taka 3 kökur og segja "allt er þegar þrennt er". Þessi tala kemur víða við og ætla ég ekkert að fara að tíunda það neitt hér í smáatriðum en svona það helsta sem mér dettur í hug....þá voru vitringarnir 3, það eru 3 hliðar á þríhyrning, heilög þrenning og svo framvegis. Fyrir áhugasama er hægt að smella HÉR og sjá meiri upplýsingar um töluna 3. Af þessum sökum, þá tel ég að árið verði gott ár og ég komist langt með það að lagast eða jafnvel verða góður af þessum flogum sem hafa verið að stríða mér síðustu 2 ár.....já síðustu 2 ár og er þetta sem sagt ÞRIÐJA árið sem ég gæti flokkast sem flogaveikur einstaklingur.

Margt meira er hægt að ræða um á nýja árinu....Ég til að mynda fékk smávegis vinnu sem ég er að fara að byrja í á morgunn. Ég veit ekki alveg nákvæmlega um hvað hún snýst nema svona í meginatriðum en það á allt eftir að koma í ljós. Þessi vinna er hlutastarf hjá Háskólasetrinu á Selfossi og er það ágætt að byrja rólega þegar maður er að koma sér aftur út í lífið eftir allan þennan veikindapakka.

Árið endaði nokkuð vel....Ég fékk hana Ásdísi mína heim og brölluðum við hitt og þetta saman, ásamt því að hitta fullt af fólki, bæði um jólin og eftir jól. Matarboð, jólaboð og ég veit ekki hvað og hvað. Reyndar voru síðustu dagarnir fyrir jól frekar strembnir hjá mér þar sem ég tók upp á því að byrja að dútla í skúrnum og smíða úr gleri og var orðið svolítið stress að ná að klára allar jólagjafirnar, þ.e. glergjafirnar fyrir jól :$ en það hafðist nú allt saman með smá vökum og vakna snemma :lol:. Hægt er að sjá afrakstur glersmíðanna á Facebook síðunni minni en fyrir þá sem ekki eru með Facebook, þá má vel vera að ég setji inn myndir hérna líka en ætla þó ekki að gera það í þetta skiptið.

Milli jóla og nýárs fór ég svo með tengdó, Ásdísi og hennar systkinum upp í sumarbústað í Vaðnesi og var það hin fínasta ferð sem tók óvænta stefnu þegar Ásdís var að baka vöflur og fórum við heim fljótlega eftir það. Tek það samt skýrt fram að sú heimferð kemur vöflubakstrinum ekkert við eða neinum veikindum neins en ætla þó ekki að nefna hvað það var sem olli þessari heimferð 8|

Á áramótunum var ég í Reykjavík og í fyrsta skipti síðan ég man eftir mér, þá keypti ég ekki neina flugelda!!! Ég gekk inn á flugeldasöluna og hreinlega fylltist valkvíða og þegar verðin bættust ofan á valkvíðann....þá var lítið hægt að gera en að vera flugeldalaus yfir áramótin!! Ég átti reyndar nokkrar rakettur síðan um síðustu áramót og ákvað ég að láta það bara duga :d

Fljótlega eftir áramótin fékk ég svar við maili sem ég sendi á þingmenn þann 30. desember 2009 og var það svar frá Ólínu Þorvarðardóttur. Hún var heldur betur grimm og bara dónaleg að mínu mati....hún er bara í þannig starfi að ef hún getur ekki tekið gagnrýni, þá verður hún að finna sér eitthvað annað að gera en að starfa á Alþingi. En svona svo fólk sjái og skilji kannski aðeins hvað ég er að fara með þessum orðum mínum, þá set ég hér inn bréfið sem ég sendi á þá þingmenn sem samþykktu þetta leiðindafrumvarp sem forsetinn síðan synjaði.
Mitt bréf hljóðaði svo:

Ég kýs þig ekki, þú kaust með Icesave

Með því að samþykkja þetta reikna ég með því að þið hafið einnig fallist á
þau orð sem féllu í fréttum um daginn að almenningur væri hreinlega of
heimskur til að taka afstöðu og kjósa um þetta mál.

Að auki vil ég bæta við að allur þessi niðurskurður er til skammar og þá
sérstaklega sá niðurskurður sem hefur átt sér stað eða mun eiga sér stað í
heilbrigðiskerfinu. Einnig munu ýmsar skattahækkanir ekki skila inni meiri
tekjum, þær munu frekar draga úr þeim þar sem fólk heldur frekar að sér
höndunum og spáir meira í hverja krónu sem það eyðir í t.d. matvæli.
Gáfulegra hefði verið að halda sköttum í lágmarki og fá þær tekjur inn.

Ég gæti haldið lengi áfram en ætla ekki að gera það og langar mig bara að
lýsa yfir vanþóknun minni á þessum gjörðum ykkar og vona hreinlega að
kjósendur í næstu alþingiskosningum muni eftir þessu og refsi ykkur með því
að skila frekar inn auðu atkvæði eða kjósa e-h annan en ykkur.
Með kveðju
Sigurjón Valgeir.

Svar hennar var síðan svona:

Skammastu þín fyrir aðra eins áramótakveðju til þeirra sem eru að vinna fyrir hagsmunum þínum og komandi kynslóða.
Skammastu þín fyrir að áreita með sjálfsbirgjungshætti og yfirlæti það fólk sem hefur lagt nótt við nýtan dag til þess að forða íslenskri þjóð frá gjaldþroti, og leggur þetta á sig undir skítkasti og öfgafullum hatursáróðri.
Við höfum ekki búist við neinu þakklæti - en það er ömurlegt að finna mannfyrirlitningu þína og ýmissa annarra í garð þeirra sem núna eru að vinna hið erfiða verk sem felst í því að endurreisa efnahagslífið og forða þjóðinni frá ennþá verra hruni en því sem dundi yfir okkur hausið 2008.
Ólína Þorvarðardóttir
Alþingismaður
s. 5630701 / 8923139

En að öðrum og skemmtilegri hlutum....ég er búinn að eiga afmæli. Núna er hægt að segja að ég sé orðinn 27 ára gamall. Það er alltaf undarleg tilfinning að eiga afmæli....þó maður sé ekki degi eldri en daginn áður og einnig er maður ekkert eldri en maður vill vera, þá er alltaf hálf skrítið að eiga afmæli. Ég veit ekki alveg hvað það er.....en það er eitthvað skrítið við það :$

Svona að lokum ætla ég að segja frá einu svolítið spes sem ég hef aldrei áður lent í.....ekki veit ég alveg hvers vegna þetta gerðist en þetta gerðist nú samt. Ég fékk hiksta eins og margir lenda oft í en hann hverfur fljótlega og gleymist. Ég fékk hiksta og var með þennan hiksta alveg þangað til ég fór að sofa og þegar ég vaknaði og fór á fætur.....þá var ég ennþá með hiksta!! Þetta var líka svo öfgakenndur hiksti.....ég alveg kipptist allur við og hann var undir það síðasta bara orðinn sár. Ég hef aldrei fengið hiksta sem stendur yfir í rúman sólarhring en allt getur nú gerst!! Sérstaklega þegar maður er undarlegur og sérstakur eins og ég :lol: en hvar væri heimurinn án sérstaka fólksins?? Það væri hálf leiðinlegur heimur ef allir væru bara fullkomnir og enginn sérstakur til að vera, þó ekki örlítið frábrugðin fullkomna fólkinu ;)

En fyrir þá sem þekkja mig ágætlega vita kannski að ég get orðið hálf heltekinn af hlutum og þá sérstaklega e-h sem margir gefast fljótlega upp á. Þannig var það um daginn að Guðlaug Stella kom heim með svona Rubix Cube (kubbur með lituðum kössum og á að raða heilli hlið þannig að litirnir passa saman) og þegar ég sá hann bað ég um að fá að prófa. Þessum kubb verður ekki skilað í bráð til Stellu, amk ekki fyrr en ég klára hann. Ég hef stundum staðið sjálfan mig að því að sitja í sófanum í nokkra klukkutíma og reyna að leysa þennan kubb og ég ætla ekki að gefast upp fyrr en mér hefur tekist það!!

En ætli ég láti þetta ekki duga í bili.....ég HVET þá sem detta hérna inn og lesa hingað niður að setja komment í kommentadálkinn....svona svo maður sjái hvort einhver kíki hérna inn eða hvort ég sé bara að skrifa þetta og sé sá eini sem les þetta ;)

Brunahaninn.....

Mon, 30 Nov 2009 11:30:42 GMT

Jæja....enn og aftur er ég mættur hér galvaskur að vanda og Nóvember á síðustu dögum sínum þetta árið. Það má segja að Nóvember hafi bara verið ágætis mánuður en undarlegur samt.....amk þegar maður spáir í veðrinu. Ég er farinn að halda að eftir að ég og pabbi settum upp veðurstöðina, þá hreinlega hræðist lægðirnar að koma hingað!! Í nokkra daga var loftþrýstingur t.d. í kringum 958 hPa sem oft myndi þýða brjálað veður en það var bara heiðskýrt og blíða. Svona til að skýra þetta örlítið, þá eru djúpar lægðir sem koma með þessi vondu, brjáluðu haustveður oft ekki nema 970 hPa en fallegar, rólegar og heiðskýrar vetrarstillur þá með loftþrýsting um og yfir 1013 hPa.
Einnig hafa norðanáttir verið ríkjandi og hefur eiginlega bara verið NA-átt hérna og hiti. Maður hefði haldið að þessar djúpu lægðir sem hafa komið hingað myndu koma með brjálað veður en þær gerðu það ekki og einnig hefði maður reiknað með því að þessar stífu norðanáttir, samfara þessum djúpu lægðum myndu draga kalt loft úr norðri en þær gerðu það heldur ekki :$
En svona getur veðrið nú verið undarlegt

En núna er kominn snjór....það heldur betur snjóaði í gærmorgunn. Ég vaknaði um 9 og leit út um gluggann hafði þá jörðin örlítið gránað, ekkert meira en það. Ég lagði mig aðeins aftur, enda var Sunnudagur og þegar ég vaknaði var kominn hálfgerður bylur og mikill snjór. Ef einhver tímasetning er slæm fyrir bílrúður til að klikka....þá var þetta nákvæmlega veðrið til þess 8|
Bíllinn hjá mömmu og pabba ákvað nefninlega að taka upp á því um nóttina að skrúfa niður gluggann við bílstjórasætið og uppgötvaðist það ekki fyrr en nota þurfti bílinn eftir hádegi og þurfti pabbi að moka sig inn í bíl, því bíllinn var fullur af snjó!!

Í morgunn fékk ég hringingu frá tannlækninum mínum þar sem ég hafði pantað tíma um daginn og var verið að ath hvort ég gæti komið í dag klukkan 10:00. Ég sagði bara "já" og var mættur upp á tannlæknastofu rétt fyrir 10. Áður en ég lagði af stað, þá kíkti ég á stjörnuspánna mína á mbl.is eins og ég geri oft (meira gert í gamni en alvöru) og þar stóð: Steingeit: Stundum er betra heima setið en af stað farið. Ef þú lætur undan er betra að gera það fyrri hluta dags.
Ég hugsaði með mér...."jæja, best að klára þetta þá bara af fyrri part dags" ;)
Ég settist í tannlæknastólinn og tannlæknirinn fer að skoða upp í mig, taka myndir og þess háttar tannlæknadót og fann bara eina holu, en það var þar sem ég hafði fundið örlítið til upp á síðkastið. Allt var að verða tilbúið til að fara að gera við þessa holu og heyri ég þá að síminn hringir frammi í afgreiðslu. Aðstoðarkona tannlæknisins kemur inn í herbergi og segir "Það þarf að taka vatnið af húsinu, það var einhver sem keyrði á brunahana". Frábært....loksins þegar maður þorði að fara til tannlæknis, kominn í stólinn, allt tilbúið og nánast byrjað að bora...þá keyrði einhver á brunahana og allt varð vatnslaust! En það var nú reyndar gott að borun var ekki byrjuð þegar vatnið var tekið af ;)
Þannig að ég var sendur heim og þarf að koma aftur seinna og verður þá gert við þessa blessuðu holu. Ég hafði reyndar búist við miklu fleiri holum....en það er kannski vegna þess að ég hef frestað því lengi að fara til tannlæknis og maður býst oft við því versta þegar að þessum málum kemur 8|
En þarna var stjörnuspáin næstum því rétt....hún hefði frekar átt að segja mér að fresta því sem ég væri að fara að gera fram á seinni part dags.

En ég læt þetta duga í bili

Hugleiðing og annað.....

Wed, 11 Nov 2009 01:00:50 GMT

Jæja....Ég fór að spá í því um daginn hvernig læknar velja sér sín sérfög eða sérgrein. Sumar greinarnar hljóma ósköp eðlilega, amk í mínum eyrum, en hvers vegna velja þessir einstaklingar þetta sem sitt sérsvið? Allt er þetta hið besta fólk upp til hópa en við sumar lækningar gæti ég t.d. ekki hugsað mér að vinna við. Sem dæmi um sérsvið sem ég gæti ekki verið á eru t.d. Smitsjúkdómalækningar, Veirufræði, Sýklafræði og Húð- og kynsjúkdómafræði. Þeir sem mig þekkja vita að ég er frekar sýklahræddur og með "netta" snertifóbíu gagnvart fólki þannig að ef ég ætti að fara að finna út hvað amaði að einhverjum einstakling sem væri með óþekktan smitsjúkdóm, þá væri best að gera það í gegnum e-mail frá mínum bæjardyrum séð. Veirur geta hins vegar verið heillandi og sniðugar á þann hátt að þær veikja okkur og finna oft ráð til að fjölga sér og stökkbreytast, svo við þurfum að leggja í ómældan kostnað til að finna mótefni eða eitthvað til að drepa þær. En hvers vegna velja læknar sér þetta sem sérgrein, vitandi það að þeir gætu þess vegna fengið í sig veiru eða sýkla (og jafnvel kynsjúkdóm ef þeir fara ekki varlega) sem eru nýjar á "markaðnum".
Sumar sérgreinarnar getur maður vel skilið að laði unglækna að, s.s. barnalækningar, bæklunarskurðlækningar (þar eru oft peningar), en hvers vegna kviknar áhugi lækna á augnlækningum, geðlækningum, meltingarlækningum og ég gæti lengi haldið áfram? Ég er alls ekki að tala illa til lækna sem velja sér "undarlegar" sérgreinar frá mínum bæjardyrum séð, ég er bara að velta þessu fyrir mér.
Ég hef heilmikið kynnt mér heilann og taugarboð og þess háttar hluti en ég hefði aldrei gert það nema vegna 20. desember 2007 og skil vel þá sem hafa fetað þá braut í sínu námi, en það er kannski vegna þess að ég hef verið mikið í kringum þá og spjallað við marga af þeim. Hvað var það sem dreif þá út í heila- og taugalækningar? Ætli augnlæknar hafi séð illa í náminu eða meltingarlæknar haft slæmar hægðir í sínu námi?
Sumt af þessu er eitthvað sem maður veit varla hvað er, en það eru t.d. Innkirtla- og efnaskiptalækningar. Ég þurfti t.d. um daginn að spyrja hvað myndi flokkast sem innkirtill því það var verið að mæla starfsemi þeirra í einni blóðprufunni sem ég fór í og var ég fræddur örlítið um Innkirtla og hvað þeirra hlutverk væri í líkamanum. En hvar finna læknanemar þennan áhuga sinn á ofangreindum sérgreinum. HÉR er hægt að smella á tengil sem færir mann á vef Landspítalans og er þessum fögum gert betri skil en hér.
En svona að lokum í þessari lækna umfjöllun, hvers vegna velja karlmenn sér t.d. að verða kvensjúkdómalæknar? Oft hefur manni dottið í hug að það hljóti að blunda smá perri í þeim en mér þykir það nú fremur ólíklegt, ef maður vill skoða svona hluti er einfaldast að fara bara á internetið og googla! En konan þeirra hlýtur að vera afskaplega brosmild eftir hjónaleiki þeirra hjóna þar sem karlinn kann á og veit um öll helstu svæðin sem falin eru hinum venjulega karlmanni. Ég reikna einnig með að hann komi ekki heim með vinnuna sína og þegar hjónin fari upp í rúm að hann segi við hana "jæja Dóra mín, eigum við að leika okkur aðeins?" Frúin tekur vel í þetta og Boggi læknir byrjar, "jæja Dóra mín, ég ýti hérna til hliðar Labia Majora og er kominn að Labia Minora. Er þetta í lagi ástin mín?" Dóra jánkar því og Boggi læknir heldur áfram, "Jæja Dóra mín, þá er ég kominn að clitnum þínum....hann er e-h undarlegur í dag 8| "
Jæja....ég ætla ekkert að fara að halda áfram með þessa lýsingu en þeir sem þoldu að lesa þetta sjá hvert þetta leiðir.
En eins og ég var að velta fyrir mér í upphafi, hvernig velja læknar sér sitt sérsvið? Það er sjálfsagt svipað og jarðfræðingar velja að fara í jarðhitafræði, jöklafræði, eldfjallafræði eða eitthvað annað tengt jarðfræði.....þeir velja það sem vekur hjá þeim mesta forvitni og áhuga.

En ég ætla að halda mig aðeins meira hjá læknunum ;)
Eins og þeir sem hafa lesið bloggið mitt hafa kannski tekið eftir því að ég er svei mér þá farinn að halda að ég sé læknasjúkur :$ . Kannski er þetta bara ræfilsskapur í mér að vera alltaf að fara til læknis en mér þykir betra að fara til læknis, heldur en að kvarta lengi í öllum yfir einhverjum kvilla.....til þess eru læknar, maður getur kvartað í þeim, grátið á öxlinni á þeim, fengið kaffisopa hjá þeim og síðan eru þeir bara margir hverjir fínir menn og konur. En ég ákvað að skella mér í magaspeglun núna á mánudaginn síðasta. Fyrir speglunina spurði ég hvort ég gæti ekki fengið þetta á videó en það var því miður ekki hægt en ég gat fengið ljósmyndir af þessu. Á meðan hann var að spegla mig tók hann nafni minn Sigurjón (nafn læknisins) eftir því að ég var alltaf að horfa svo mikið á pappírsþurrkurnar en það speglaðist af sjónvarpinu á boxið sem þurrkurnar voru geymdar í þannig að hann snéri bara rúminu sem ég lá í og ég fékk að fylgjast með þessu öllu saman.
Það fyrsta sem blasti við mér var ekki fögur sjón......ekkert nema blóð allsstaðar og ég fór að reyna að spyrja hvers vegna það blæddi svona mikið, ég með fullan munnin og hálsinn af slöngu, þannig að það eina sem kom út úr mér var "MMmmmmMM" en hann er snjall hann Sigurjón læknir og skildi mig og sagði, "já, þetta blóð er vegna þess að ég kleip hérna aðeins á nokkrum stöðum og tók sýni". Síðan sýndi hann mér hvernig hann tekur sýni og kleip aftur nokkrum sinnum og lýsti öllu sem við vorum að sjá á sjónvarpsskjánum...þegar við fórum í niður í skeifugörnina og sáum gula gallið og síðan sýndi hann mér allan magann. Einnig sýndi hann mér magaopið og hvar gamla magaaðgerðin var gerð og sá að hún hefur rifnað upp og er ekki að gera það sem hún átti að gera. Svo á endasprettinum sýndi hann mér raddböndin mín og ég ákvað þá að syngja örlítið og sá þá vel hvaðan þessi fallega söngrödd mín kemur....ekkert smá falleg raddbönd sem ég hef :haha:
En mér varð að ósk minni og fékk með mér þær myndir sem hann tók í þessari "spennuaðgerð" og fékk ég þær með mér heim á geisladisk. Ég veit ekki hvort fólk langi til að sjá þessar myndir en ég set þær nú samt hér en hef nú samt þann háttinn á að smella verður á TENGILINN til að sjá hana svo viðkvæmir geti lesið þetta blogg :lol:

En að ALLT öðrum málum. Ég fékk gott boð í sumarbústað um síðustu helgi sem ég þáði með þökkum og þakka vel fyrir mig. Þarna voru einnig Eva, systir hans Bigga og hjón úr Njarðvík. Við borðuðum ljúffengan mat á laugardaginn og spiluðum svo hinn ódauðlega GAUR og verð ég að segja að Biggi SKÍTTAPAÐI í honum!! Síðan var eitthvað um spjall eins og gengur og gerist í svona ferðum og náði ég einnig nokkrum stjörnuljósmyndum þegar létti til annað slagið ;)
En síðan fóru allir að sofa.....nema ég. Ég var bara einhvern veginn ekki það þreyttur að þurfa að fara að sofa strax, annað en þessi gamalmenni sem með mér voru í bústað, þannig að ég fann mér góðan stól, hlý föt og fór út í skó rétt hjá bústaðnum og sat þar í um það bil 1 klukkustund og naut þess að hlusta á ekki neitt. Mikið rosalega er notalegt að vera einn, í myrkri, úti í náttúrunni og heyra ekki neitt. Það var alveg logn og í raun var eina hljóðið sem ég heyrði andardrátturinn frá mér sjálfum. Þetta var alveg unaðsleg tilfinning, að sitja kyrr og horfa upp í loftið þar sem stöku stjarna kíkti niður á mig ljós sem hún sendi af stað fyrir kannski 30 milljón ljósárum (ljósið fer ~300.000 km/s og reiknið svo) og ég var viðtakandinn, Magnað. Það þykir mér að minnsta kosti en ég er ekkert heill á geði 8|.....þið ættuð að vita það sem mig þekkið ;)

En ætli ég láti þetta ekki duga í bili

Með öðrum morðum.....

Fri, 30 Oct 2009 15:22:41 GMT

Jæja....ég sit núna bara og hlusta á meistaraverkið Harry & Heimir, Með öðrum morðum. Ég verð að segja að þessir einkaspæjarar eru snillingar og eiga ekki í neinum vandræðum með að leysa hin flóknustu saka- og morðmál.

En hvað um það, þó þeir séu snjallir við að leysa ýmis flókin mál....þá er margt annað að frétta úr raunveruleikanum.

Til að byrja með, þá ákvað ég að laga örlítið tölvuna mína þar sem Delete takkinn á henni var farinn að standa á sér og var orðinn stífur. Ég kippti í hann eins og ég hef kippt í marga aðra takka á lyklaborðinu og þrifið undir þeim en þessi kipping fór ekki betur en svo að ég braut plast draslið undir honum og hef þess vegna verið Delete takka laus síðan :$
Það hefur aðeins flækt málin en þó ekki svo mikið, þannig að þetta takkaleysi hefur í raun litlu skipt og er í raun afskaplega litlar fréttir.....álíka merkilegar og að það hafi rignt um daginn.

Þá er komið að öðru máli sem meira máli skiptir, það er veðurstöðin. Ég og pabbi skelltum okkur upp á þak hérna um daginn og settum veðurstöðina upp. Það gekk allt ljómandi vel fyrir utan gott veður. Við drifum okkur í þessu því það var svo slæm veðurspá og ætluðum við heldur betur að láta veðurstöðina fá að finna fyrir því, þ.e. vonda veðrinu, en eftir að við settum hana upp, þá hefur bara ekki komið vont veður og okkur datt helst í hug að veðrið hafi skipt um skoðun þegar það frétti af veðurstöðinni og snúið við! Það var fyrst í gær sem vindáttin breyttist, en það hefur bara verið norðaustan hægviðri og í raun fremur undarlegt veður miðað við vindátt og loftþrýsting.
En hugsanlega gæti farið að blása eftir helgina, en það er þó ekki víst þrátt fyrir að djúp lægð komi upp að landinu en mér sýnist hún ekki gefa neinn vænlegan blástur!

Annað sem ég hef verið að dunda mér við eru ljósmyndatökur, en það er frekar óheppilegur tími sem ég nota við þá iðju þar sem þetta eru aðallega næturmyndir og ég veit ekki hvað nágrannarnir halda um mig því ég er alltaf að fara út á pall með myndavél og stundum sjónauka og horfi í allar áttir og upp í loftið. Ég hef einnig verið að bíða eftir flottum norðurljósum til að ná á mynd en eftir að hafa séð norðurljósin um síðustu helgi, þá hef ég beðið og beðið eftir næstu norðurljósagusu en alltaf þegar hún kemur, þá er skýjað.
En hérna eru 2 myndir sem ég tók í gærkvöldi á milli þess sem var skýjað og tek bara fram að þessar myndir eru alveg óunnar og hef ég ekkert fiktað í litum eða neinu í þeim til að laga þær.

En eitt sem mér þykir spennandi og hægt er að sjá með handsjónauka er Júpíter og 4 fylgitungl hans. Yfirleitt er hægt að sjá Júpíter, lágt á himni og ágætt er að staðsetja hann því hann er c.a. í suðri um 22:00 og ansi bjartur. Þessi 4 fylgitungl hans eru síðan eins og daufar stjörnur og kallast Gallileo tunglin en þetta eru tunglin sem Gallileo sá með sínum kíki þegar hann lifði fyrir þó nokkrum árum.

En ætli ég láti þetta ekki duga í bili

Smá fréttir.....

Thu, 15 Oct 2009 02:54:34 GMT

Jæja....það er nú margt og mikið sem gerst hefur upp á síðkastið og ég á pottþétt eftir að gleyma einhverju af því 8|

En við skulum þá bara byrja.....ég var að fara til læknis einn föstudagsmorgun þegar annar læknir hringir (hljóma eins og ég sé með fetish fyrir læknum) og segir mér bara að koma upp á Borgarspítala, því hann vilji bara leggja mig inn og fylgjast með mér. Ég var kominn alla leið að Hveragerði og við snérum við, svona til að kippa upp smá dóti fyrir mig til að hafa á spitalanum. Reyndar er þessi innlögn tengd einu sem gerðist á miðvikudeginum á undan, en nýlega uppgötvuðum við "nýja/gamla" tegund af flogum, sem eru aftur komin og þegar þau hófust rétt rúmlega 17 á miðvikudag, þá ákvað ég að skrá niður fjölda þeirra og klukkan 23:00 voru þau orðin 99 talsins, já engin innsláttarvilla þar....99 kvikindi + 5 "venjuleg". Sá dagur endaði amk uppi á heilsugæslu þar sem ég fékk að sýna lækninum sem var á vakt hægri rasskinnina á mér og gaf hann mér sprautu með Diazepam í rasskinnina (ekki í sjálft opið) :s og gaf mér c.a. 20 mínútur til að koma mér heim því hann reiknaði með því að ég yrði ANSI syfjaður!! Reyndar þegar heim var komið, þá var ég bara nokkuð fínn.....leið bara ANSI vel 8|
En aftur að Borgarspítalanum, þeir vildu sem sagt fylgjast með mér eitthvað og sjá hvernig ég væri, ég fór í þessi venjulegu próf eins og heilarita (EEG) og blóðprufur og eitthvað og síðan sagði læknirinn minn á áður en hann fór heim á föstudeginum....."ég sé þig síðan bara á mánudaginn". Þá fattaði ég að ég yrði þarna yfir alla helgina, en það var allt í lagi þar sem starfsfólkið þarna á B2 er ekkert annað en FRÁBÆRT, en maturinn mætti vera betri ;)
Á mánudeginum var síðan ákveðið að setja mig í heilasírita, eins og ég hef áður farið í hérna heima og einnig úti í USA en munurinn núna var sá að þeir breyttu ekkert lyfjagjöfinni þannig að flogin sem ég fékk fyrir þá voru "mín" flog en ekki einhver ofsafengin flog sem koma þegar lyfin eru tekin af mér snöggt, til að framkalla flog! Þannig að ég var bara ánægður með þessa ferð í síritann......helsti gallinn við hann er samt sá að maður er lengi að ná líminu úr hárinu á sér og höfuðleðrinu og oft lítur maður út eins og maður sé dauðvona af flösu!!

En svona aðeins til að lýsa heilasírita, þá eru tengdar fjölmargar litlar electróður á höfuðið á manni, þær límdar niður með fremur leiðinlegu lími og síðan eru allar þessar snúrur....c.a. 30 talsins settar í snúru og hún tengd við box sem er fest framan á mann með ólum og úr boxinu er önnur snúra og liggur hún að tölvu. Þannig að í grófum dráttum....þá er maður tengdur við þetta allan sólarhringin, dregur snúruna á eftir sér ef maður þarf að fara á salernið, ganga um herbergið og í raun gera allt og síðan er maður tekinn upp á videó allan tímann með hljóði...þannig að ef maður þurfti að bora í nefið, þá var ein gott að gera það undir sænginni sinni :haha:
Ég hef reyndar heyrt sögur, bæði héðan og frá USA að fólk átti sig ekki á því að videó kameran tekur líka upp á nóttinni!!! Þannig að það hafa ýmsar villtar senur náðst upp á videó hjá fólki.....annað hvort með sjálfu sér eða maka!!

En mikið var ég feginn að losna út á fimmtudeginum því það var að koma svo brjálað veður....! Ég var búinn að vera að bíða eftir þessu veðri í langan tíma, eða frá því að ég sá lægðina vera að myndast e-h staðar þarna langt suður í rassgati og það hefði nú verið ljóta ruglið að missa af því....fastur í einhverjar snúrur og mega ekki fara út úr herberginu mínu þarna uppi á B2! Hefði ekki einu sinni getað fylgst með á netinu eða í gegnum síma því fartölvur, gsm símar og öll raftæki máttu ekki koma nálægt mér eða inn í herbergi 8|
En það varð nú lítið úr þessu veðri á Selfossi.....bjóst alveg við því þar sem hann var svo austanstæður og ég fann út hvers vegna Selfoss er alltaf í logni þegar hann blæs úr austri...það er smá hæðaraukning þegar í austur dregur frá Selfossi...ekki mikið, hæst um 100 m.y.s. en 20 m.y.s. línan sker Selfoss í tvennt. Þannig að mín ályktun er sú að þessi litla hæðaraukning skýli Selfossi í austanátt, en um leið og vindurinn snéri sér örlítið í NA-átt, þá fór heldur betur að blása hér :haha:

Síðan hef ég aðeins verið að bardúsa í kringum handboltann, þ.e. í kringum handboltann hjá Fjölni. Steinar er farinn að æfa með Fjölni og áttu þeir sinn fyrsta leik við Selfoss og skemmti ég mér konunglega uppi í stúku að góla eitthvað inn á völlinn og það virtist oft á tíðum trufla leikmenn Selfoss :lol:

.....og síðast en ekki síst! Svínaflensan (H1N1) er mætt hingað, heldur betur. Fyrst var Guðlaug Stella með hana og ég ætla ekki að lýsa því sem gekk á þegar hún var sem verst af henni og núna er mamma gamla komin í sama pakkann!!! En þar sem ég var frekar heppinn, þá átti ég Tamiflu og er byrjaður að taka þær inn. Ég byrjaði eiginlega um leið og ég fór að finna fyrir einkennum, sem var á nákvæmlega sama tíma og gamla, en nú er hún orðin fárveik en ég bara nokkuð hress, fyrir utan smá hósta en það tekur því ekkert að kvarta yfir honum því hann er svo lítill, ef ég myndi hósta á venjulegum degi jafnmikið (lítið), þá tæki ég ekki einu sinni eftir því, en þar sem þessi H1N1 er í gangi, þá tekur maður meira eftir hverjum hósta, verk eða hverju sem er!!

En ætli ég láti þetta ekki duga í bili og endilega kommenta....þá sé ég hverjir kíkja hérna inn og hverja Facebook er búið að heltaka með sínum prófum og könnunum!

Smá fróðleikur um flogaveiki

Tue, 29 Sep 2009 02:30:01 GMT

Hvað er Flogaveiki?

- Eftir Sigurjón Valgeir Hafsteinsson –

Flogaveiki er almennt hugtak sem notað er þegar truflun verður í rafboðum milli fruma í heilanum. Heilafrumurnar nota rafboð til að hafa samskipti sín á milli, t.d. til að búa til minningar, hugsanir og tilfinningar og getur ein heilafruma haft tengingu við allt að 100.000 aðrar heilafrumur og ef truflun verður á þessum boðum getur það orsakað flog. Þegar flog verður, koma þessi rafboð mun hraðar, allt að 500 rafbylgjur á sekúndu í stað 80 sem eru venjulega og vegna þessarar truflunar kemur flog. Þessi truflun getur verið vegna rangra efnaboða í heilanum eða skemmda í heilafrumum. Eins getur flogaveiki komið eins og þruma úr heiðskýru lofti án fyrirvara og í um 40% tilfella finnast engar skýringar á því hvers vegna flogaveikin byrjar. Þessi truflun á rafbylgjum er yfirleitt á litlu svæði í heilanum en getur breiðst fljótt út og náð til alls heilans, sem síðan hefur áhrif á líkamann. Áhrifin á líkamann geta verið mismunandi, þ.e. geta náð til alls líkamans eða til ákveðinna hluta hans, s.s. einstaklingurinn getur misst málið í stutta stund, skynjun breyst, ósjálfráðar hreyfingar eða meðvitund tapast. Þessi breyting á líkamsstarfseminni þekkist sem flog.

Mynd 1. Vinstra heilahverl, litli heili og heilastofn.

Flog geta verið mismunandi milli einstaklinga og einnig skiptir máli hvar upptök þeirra eru í heilanum. Flog eru oft flokkuð í 3 flokka, þ.e. altæk flog, sértæk flog og óflokkanleg flog. Til altækra floga flokkast krampaflog og störuflog en sértækum flogum má síðan skipta í einföld sértæk flog og fjölþætt sértæk flog og ræðst flogamynstrið af því hvar upptökin eru í heilanum. Altæk flog ná til alls heilans, en sértæk flog til hluta heilans en geta breiðst út og orðið að altæku flogi og taka þá oftast á sig mynd krampaflogs. Undir óflokkanleg flog falla flog sem ekki er hægt að skilgreina vegna ónógra upplýsinga eða einkenna sem ekki falla undir hina flokkana. Einnig er hægt að tala um að flogaveiki sé sjálfvakin eða sjúkdómsvakin og eru flogin þá annað hvort vegna erfðaþátta (sjálfvakin) eða vegna veikinda eða slyss (sjúkdómsvakin) og eru upptökin þá yfirleitt staðbundin en flogin geta breiðst út og orðið altæk. Um 45% floga eru altæk flog en 55% sértæk flog, þar af eru fjölþætt sértæk flog um 34%. Krampaflog og störuflog eru algengustu gerðir altækra floga.

Altæk flog

Krampaflog: Þá dreifast flogabylgjurnar um allan heilann og geta þau bæði verið altæk frá byrjun eða byrjað sem sértækt flog sem síðan breiðist út. Í byrjun krampaflogs dragast vöðvar kröftuglega saman (kallað samdráttarstig) og líkaminn verður stífur. Einstaklingurinn missir meðvitund, dettur, blánar jafnvel í framan og taktfastir kippir eða krampar fara um líkamann. Í byrjun flogs á samdráttarstiginu þrýstist loft úr lungum og getur það orsakað sérkennileg hljóð, korr eða óp. Þar sem eðlilegar vöðvahreyfingar eru ekki til staðar getur verið að einstaklingurinn bíti í tunguna eða kinnar og blóðlituð „froða“ getur lekið út um munnvik en það er munnvatn sem lekur út milli samabitinna tanna, en þessi froða er munnvatn með loftbólum sem myndast í munnvatninu vegna t.d. hryglukenndrar öndunar. Þegar samdráttarstiginu er lokið taka við taktfastir krampakippir í útlimum og búk og eftir um 2 mínútur dregur smátt og smátt úr krömpunum en einstaklingurinn getur verið meðvitundarlaus í um 5 mínútur. Eftir krampaflog getur einstaklingurinn síðan verið ruglaður í nokkurn tíma og í flestum tilfellum mjög þreyttur, jafnvel í nokkra daga.

Störuflog: Þau eru skilgreind sem skammvinn flog og eru upptök floganna talin vera í heilastofni. Einstaklingur sem fær störuflog „dettur út“ og byrjar flogið jafn snögglega og það hófst og er dæmigert flog einungis í nokkrar sekúndur (5 – 15 sek). Þessi flog getur verið erfitt að greina þar sem þau vilja oft fara framhjá fólki og jafnvel framhjá einstaklingnum sjálfum. Sem dæmi um það hvernig störuflog er, þá hættir einstaklingurinn allt í einu því sem hann er að gera, starir, augnlokin bærast og höfuðið hallast örlítið fram á við. Þegar flogið er búið, heldur einstaklingurinn áfram fyrri iðju eins og ekkert hafi í skorist þar sem meðvitundarleysið er svo stutt og ansi oft tekur enginn eftir neinu. Störuflog geta síðan tekið á sig flóknari mynd og er þeim þá oft ruglað saman við skammvinn sértæk flog sem eiga upptök sín í gagnaugalappa heilans.

Störuflog hefjast nánast alltaf fyrir 15 ára aldur, yfirleitt hefjast þau á aldrinum 5 – 9 ára og hætta þau fyrir 20 ára aldur. Ef þessi flog eru ekki hamin með t.d. lyfjum geta þau þróast yfir í krampaflog síðar.

Sértæk flog

Mynd 3. Sértæk flog

Eins og áður sagði er sértækum flogum skipt í 2 aðalflokka, þ.e. einföld sértæk flog þar sem ekki verður röskun á meðvitund og fjölþætt sértæk flog þar sem meðvitund raskast. Einkenni þessara floga geta verið margskonar, þ.e. kippir, skynjanir, einkenni frá dultaugakerfi, geðrænt ástand og ósjálfrátt atferli (eingöngu í fjölþættum sértækum flogum).

Hreyfiflog: Það fer eftir uppruna trufluðu rafboðanna í heilanum hvernig þessi flog lýsa sér, ef upptökin eru í hreyfiberki heilans lýsa þau sér sem samdráttur vöðva í gagnstæðum helming líkamans, þ.e. ef upptök flogsins eru í hægra heilahveli, þá koma flogin fram í vinstri hluta líkamans. Ekki verður röskun á meðvitund einstaklingsins á meðan flogið gengur yfir nema flogabylgjurnar dreifi sér í allan heilann og verður flogið þá altækt krampaflog. Hins vegar getur einstaklingurinn fundið fyrir tímabundinni lömun í þeim vöðvum sem flogið náði til. Önnur gerð hreyfifloga eru svokölluð snúningsflog og eru þá upptökin í hreyfisvæði ennislappa. Þá beinast augu og höfuð í áttina frá því því heilahveli sem trufluðu boðin eru í og einnig lyftist handleggur upp, en meðvitund helst óskert. Þegar upptök floga eru í málstöðvum getur einstaklingurinn misst málið án þess að meðvitund skerðist, en þegar flogið er búið fær einstaklingurinn málið aftur. Hreyfiflogin eru yfirleitt sjáanleg og finnur einstaklingur einnig fyrir þeim en stundum geta þó komið fram flog sem ekki eru sjáanleg og er þá um brenglaða innri skynjun að ræða sem einstaklingurinn finnur fyrir.

Skynflog: Þessi flog eiga upptök sín í skynberki en ef upptökin eru í skynberki nálægt hreyfiberki geta þessum flogum einnig fylgt hreyfingar ásamt ýmsum skynjunum. Þessum flogum geta fylgt sjóneinkenni, sem einkennast þá af einföldum skynjunum, s.s. deplum, ljósglömpum og eldglæringum og eru upptök floganna þá í sjónberki. Hins vegar ef upptökin eru í gagnaugalappa verða skynjanirnar flóknari, litríkir atburðir og ofskynjanir og eru þessar skynjanir þá yfirleitt þær sömu kast eftir kast. Heyrnareinkenni flokkast einnig undir skynflog og getur einstaklingurinn þá heyrt ofheyrnir eins og són, hringingu, flaut og ýmis konar hljóð. Heyrnarflog benda til þess að upptök floganna séu í aðalbungu og berki gagnaugalappa. Lyktareinkenni eru algeng í fjölþættum sértækum flogum og eru þá ofskynjanir á lykt og bragði og yfirleitt eru þessar ofskynjanir óþægilegar og finnur einstaklingurinn þá t.d. lykt og bragð af brenndu gúmmí eða saur. Þegar einkenni frá dultaugakerfi koma einkennast þau oft af herpingstilfinningu og óþægindum í maga. Þessu getur fylgt sviti, hjartsláttur, útvíkkun sjáaldra og lækkun blóðþrýstings, aukið munnvatnsrennsli og þörf fyrir að kasta þvagi. Fleiri flogagerðir sem geta flokkast sem skynflog eru t.d. geðræn flog, hugsanatruflanir, skynjanatruflanir, tilfinningatruflanir, ráðvilluflog og árásagirni.

Talið er að ráðvilluflog komi fram hjá um 75% einstaklinga með fjölþætt sértæk flog. Þá verður röskun á meðvitund einstaklingsins og getur hann framkvæmt hina ótrúlegustu hluti, án þess að „vera í sambandi“. Í ráðvilluflogum getur hegðun einstaklingsins verið klaufaleg og beinist athygli hans ekki að neinu sérstöku og getur einstaklingurinn farið að fitla við fötin sín, afklæðst eða jafnvel hlaupið um og virst hræddur. Ef reynt er að halda einstaklingnum eða hindra hann, getur hann brugðist við með ofsa (árásargirni) en þeim ofsa er yfirleitt ekki beint að neinu sérstöku og er yfirleitt hættulítill.

Hafa verður í huga að allar gerðir sértækra floga geta breiðst niður í djúplög heilans og endað í afleiddu altæku krampaflogi. Eins og sjá má hér að ofan, geta fjölþætt sértæk flog verið margbreytileg og áður fyrr var þeim oft ruglað saman við geðræna kvilla og fólk jafnvel lagt inn á geðsjúkrahús og úrskurðað geðveikt.

Aðrir flogaflokkar

Fallflog: Þá tapast skyndilega vöðvastyrkur líkamans og allur líkaminn verður slappur. Einstaklingurinn dettur niður, missir meðvitund og getur meitt sig illa.

Hitakrampar: Þeir teljast reyndar ekki sem flogaveiki en tengjast henni þó óbeint þar sem þeir geta líkst krampaflogum. Kramparnir tengjast sótthita og svo virðist sem erfðaþættir ráði því hverjir fá hitakrampa og eru drengir líklegri til að fá þessa krampa. Mikilvægt er að reyna að koma í veg fyrir þessa krampa með hitalækkandi aðgerðum, því hitakrampi getur orsakað flogafár sem getur leitt til súrefnisskorts og sköddunar í heila. Verði slík sköddun á heila, getur hún leitt til fjölþættra sértækra floga.

Gott að vita um flogaveiki

Flogaveiki getur verið hættuleg ef flog koma þar sem aðstæður er ekki góðar, t.d. í vatni, uppi á háum stöðum þar sem einstaklingur getur dottið niður, við keyrslu og á stöðum þar sem einstaklingurinn getur slasað sig. Einnig getur ástand sem kallast flogafár verið lífshættulegt, en þá fær einstaklingurinn síendurtekna krampa og kemst ekki að fullu til meðvitundar milli krampa. Mismunandi er milli lækna hvernig þeir skilgreina flogafár, þ.e. sumir segja að ef flog standi lengur en í 5 mínútur sé hægt að segja að einstaklingurinn sé í flogafári en aðrir læknar segja að sé flogið búið að standa í 10 – 30 mínútur sé hægt að tala um flogafár. Án aðstoðar fagaðila, sem stöðva flogafárið getur það valdið varanlegum heilaskemmdum eða verið banvænt. Þess vegna er nauðsynlegt að hringja á sjúkrabíl ef flogið stendur lengi og stöðvast ekki að sjálfu sér.

Flogakveikjur

Ýmis áreiti geta komið flogi af stað hjá einstaklingum með flogaveiki og má þar helst nefna

Blikkljós sem blikka á ákveðnum hraða
Flökt á sjónvarpsskjá
Skyndileg hávær hljóð eða endurtekin hljóð
Áfengisneysla
Streita
Höfuðverkur
Tíðir og meðganga
Skortur á svefni
Vanlíðan eða pirringur
Stundum koma flog einnig að ástæðulausu

Nokkrar staðreyndir um flogaveiki

4 – 10 af hverjum 1000 eru með flogaveik
Allir geta fengið flogaveiki hvenær sem er á ævinni
Stundum fylgja flogin föstu mynstri en einnig geta þau verið algjörlega óútreiknanleg
Sumir fá áru fyrir flog sem getur undirbúið einstaklingin undir flog
Flest flog ganga fljótt yfir og hjá mörgum er hægt að hafa stjórn á flogum með lyfjagjöf
Einkenni floga eru breytileg milli einstaklinga
Flogaveiki er heilsufarsástand sem krefst skilnings og viðurkenningar
FLOGAVEIKI ER EKKI SMITANDI

Heimildir:

Þórey Vigdís Ólafsdóttir. 1991. Flogaveiki – Félagsfræðileg, læknisfræðileg og sálfræðileg kynning. Iðunn, Reykjavík.

http://www.ehealthmd.com/library/epilepsy/EPI_whatis.html heimsótt þann 20. september 2009.

http://lauf.is/ heimsótt þann 18. September 2009

Myndir:

Þórey Vigdís Ólafsdóttir. 1991. Flogaveiki – Félagsfræðileg, læknisfræðileg og sálfræðileg kynning. Iðunn, Reykjavík.

Jæja....þá er þetta komið hérna inn. Mér datt í hug að setja saman smá fróðleik um þetta efni og skella því hérna inn fyrir þá sem hafa áhuga og nenntu að lesa alla leið hingað niður ;)

Hægt er að smella á myndirnar og þá koma þær stærri, síðan er einnig hægt að fara inn í myndasafn hérna uppi til hægri og velja möppuna sem heitir Flog og þar eru þær.

Réttarfarssaga og fjárdráttur.....

Tue, 15 Sep 2009 13:02:54 GMT

Jæja....þá er maður aftur kominn á Suðurlandið eftir góða ferð í réttir fyrir norðan. Ferðin hófst snemma að morgni laugardagsins 12. september og fékk ég far með honum Steinari norður. Við mættum á Vatnsnesið í kringum hádegi og á leiðinni norður nesið sáum við nokkra smala og voru þeir í ansi misjöfnu ásigkomulagi, sumir hressir og kátir en aðrir ansi valtir :$
Þegar heim á Sauðá var komið tóku þar á móti okkur dætur Anítu og fljótlega kom húsfreyjan á Sauðá og Aníta, en þær höfðu verið að líta eftir mannskapnum uppi í fjalli og sjá hvert þeir væru komnir. Fljótlega fórum við að sjá rollur koma niður hæðina fyrir ofan Hamarsrétt og þá var heldur betur farið að styttast í fjárdrátt.
Þeir sem smöluðu fyrir Sauðá komu fljótlega eftir þetta heim í kaffi og voru veitingarnar hingar glæsilegustu, rjómaterta, súkkulaðikaka, brauð með reyktum laxi, flatkökur og ég veit ekki hvað. Menn skelltu þessu í sig og síðan var haldið niður í Hamarsrétt.

Hamarsrétt

Féð rekið inn í réttina

Rollurnar voru reknar inn í réttina og þá hófst drátturinn. Margir miklir spekingar voru að sjálfsögðu á svæðinu og var mikið um hrútaþukl :lol: sem margir töldu sig vera góða í...og ekki urðu þeir verri eftir nokkra sopa af heimasoðnu vatni með sykri og geri. Þegar búið var að draga féð í dilka var kominn tími á að reka það heim. Við rákum féð heim í fjárhús og það fé sem var á túninu við fjárhúsin rákum við upp í fjall. Eins og maður hefur oft sagt, þá er eins og kindurnar finni á sér hvert þær eigi EKKI að fara og ef þær sjá hlið sem er meira að segja lokað og þær eiga EKKI að fara í gegnum, þá einhvern vegin tekst þeim að fara í gegnum það. Það varð raunin þegar við vorum komin með þær upp að fjárhúsum. Þá ákváðu nokkrar kindur að velja hliðið sem var lokað og "ráðast" á það og höfðu þær að opna það og þá þurftu menn heldur betur að hlaupa, því þær ætluðu bara beint inn á tún. En það hafðist nú að koma í veg fyrir að þær færu langt inn á tún og komum við þeim á réttan stað, þ.e. inn í fjárhús.

Féð rekið heim

Að sjálfsögðu fór það í gegnum lokaða hliðið

Daginn eftir hófst svo heldur betur fjörið, þ.e. taka fullorðnu kindurnar frá lömbunum og síðan að flokka líflömbin frá sláturlömbunum. Það má heyra mörg sorgar jörmin, bæði frá kindunum og lömbunum þegar þau eru aðskilin og gera kindurnar mikið til að reyna að komast aftur inn í fjárhús til lambanna sinna, en kindurnar eru reknar út en lömbin skilin eftir inni.
Að lokum eru síðan sláturlömbin vigtuð og sláturbíllinn kemur og sækir þau en líflömbin eru rekin á beit.

Snati flottur

Ellert að skilja fullorðnu kindurnar frá lömbunum

Þá má segja að þessari réttarfars- og fjárdráttarsögu sé lokið og var ég alveg í skýjunum eftir þessa sveitaferð og er reyndar enn ansi ánægður með hana og erfitt fyrir mig að gleyma henni, amk í bráð, því við hverja hreyfingu finn ég ansi vel fyrir harðsperrunum eftir að draga kindurnar og reka þær hingað og þangað.

Læt þetta duga í bili en bendi á að hægt er að sjá mun fleiri myndir úr þessari ferð á Facebook síðunni minni og hægt er að smella HÉR til að skoða þær, en til að geta skoðað þær þarftu að sjálfsögðu að hafa Facebook aðgang og hugsanlega vera vinur minn þar ;)

Veiði og veður....

Thu, 10 Sep 2009 20:46:13 GMT

Jæja...þá er ég aftur mættur hér alveg eldhress. Ég var að koma heim rétt í þessu eftir hálf rólegan dag í Ölfusánni með pabba og var frekar lítið að hafa í þessari ferð. Fengum sitthvort laxaseiðið sem við vorum svo höfðinglegir að sleppa og lofuðu þau að koma aftur að ári og bíta á hjá okkur þá....stærri og sterkari ;)
Veðrið í dag var bara gott....þrátt fyrir mikla úrkomu og ég hreinlega veit ekki hvort það hafi verið e-h blautara hjá fiskunum úti í á, því það rigndi svo mikið á köflum! Einnig fór að vaxa í ánni, en ég veit reyndar ekki hvort það hafi verið rigningunni að kenna eða hvort dömubindið sem ég veiddi upp hafi verið svona rakadrægt!!!

Annars hef ég farið aðeins meira að veiða síðan ég ritaði síðasta blogg og var það einnig í Ölfusánna. Sú ferð var aðeins fjörugri en ég náði hins vegar ekki neinum laxi en landaði hins vegar 3 sjóbirtingum en pabbi náði 2 löxum og Steinar einum. Ég hins vegar var svo duglegur að missa 2 laxa (djö) eftir fjörugar og kröftugar viðureignir!! Annar var nokkuð vænn....amk 12 pund. Ekki myndi ég leggja í að setja í mikið stærri fisk í Ölfusánni með þessa stöng sem ég er með, því þó fiskurinn hafi verið í kringum 12 pundin, þá fór stöngin alveg í keng og hefði ég ekki lagt í að missa fiskinn út í straum, eins og það er kallað. Það hefði getað orðið skrautlegur barningur, með miklum hlaupum upp og niður með ánni.

En svona að öðrum málum, ég er duglegur að fara í sjúkraþjálfun þessa dagana til að koma hnénu í lag og gengur það bara þokkalega, er amk farinn að finna minna til í því :)

Svona smá af henni Ásdísi, þá er hún búin að fá íbúð og einnig fór hún í "skemmtiferð" með Helgu Möggu í IKEA og keypti hún þar ýmislegt í litlu íbúðina og einnig er hún byrjuð í skólanum og líkar bara vel þar. Ég veit ekki hvað ég get skrifað meira í kvöld þar sem ég er frekar þreyttur og hálf andlaus í bloggskrifum en ég skal reyna að lofa að bæta úr því næst :$

En ég kveð í bili

Óperur og IceSave...

Mon, 31 Aug 2009 23:20:51 GMT

Jæja...ég þori ekki öðru en að standa við það sem ég lofaði hérna í síðasta kommenti sem ég setti inn við síðasta blogg og blogga í dag :lol:

Það hefur svo sem ekki mikið verið að gerast hjá mér síðan ég bloggaði síðast þar sem ég var svo "heppinn" að næla mér í þetta skemmtilega kvef og fór megnið af síðustu viku í að reyna að ná því úr mér ásamt því bara að sofa og hvíla mig þar sem ég var e-h svo þreyttur eftir flutningana og sjálfsagt e-h konar spennufall við það að Ásdís fór út til Svíþjóðar. Annars er bara fínasta að frétta af henni og hefur hún það bara gott með Helgu Möggu, Andi og ekki má gleyma honum Theódór litla. Hún skemmtir sér konunglega við að leika við hann, skipta á honum (skil það reyndar ekki hvað stelpum þykir gaman að skipta á litlum börnum) og einnig fær hún eitthvað að passa hann.

En svona frá síðasta bloggi, þá hafa þessir kjánar á "hinu háa Alþingi" samþykkt IceSave sem ég er ekki alveg sáttur við en ætla hins vegar ekki að fara nánar út í það hér þar sem mér hitnar oft í hamsi við það þegar ég tala um þessa FÁVITA sem komu okkur í þetta og ennþá meira þegar ég hugsa um þá sem sömdu og ennþá meira um þá sem samþykktu!! :klikk:

Eftir að ég flutti úr Grafarvoginum, þá hefur rignt inn sprengjuhótunum þangað. Ekki veit ég hvort þetta sprengjuhótunarregn tengist e-h veðrinu og þeirri úrkomu sem hefur verið eða hvort þetta tengist e-h söknuði Grafarvogsbúa til mín og Ásdísar og ekkert stuð sé lengur í Grafarvogi eftir að við fórum þaðan og þeir séu eitthvað að reyna svona að krydda upp á lífið og tilveruna. Ég get nú ekki sagt það að þetta sé sniðugt, að hringja inn endalausar sprengjuhótanir sér til skemmtunar, þessir kjánar sem eru að því geta bara farið í þennan skemmtigarð sem var að opna í Grafarvogi og fengið útrás þar (ekki svona útrás eins og okkar "virtu" útrásarvíkingar samt).

Í dag hef ég verið að jafna mig eftir veiði í stóra lækinn sem skiptir Selfossi í tvennt, þ.e. Selfoss og fyrir utan á. Ég fór þangað með honum Birgi og var veiðin fremur dræm, ég fékk einn sjóbirting sem var um 1 pund og Birgir fékk einn svipaðan sjóbirting og einn sem var töluvert minni og skulum við ekkert ræða hann frekar hér því við gætum fengið á okkur kæru fyrir smáfiskadráp (við reyndar slepptum honum en ég efast um að hann hafi lifað þetta af greyið).
En mikið rosalega er erfitt að standa svona í 12 klst og veiða. Ég og Birgir vorum alveg úrvinda þegar við hættum í gærkvöldi og ætlaði ég varla að hafa það að setjast í sófann fyrir framan sjónvarpið til að hvíla mig aðeins, það lá við að við kæmum slefandi heim af þreytu. En alltaf er þetta samt gaman og get ég varla beðið eftir að fara aftur að veiða....það er svo mikið kikk sem maður fær við það að berjast við lax í svona miklu straumvatni, 7 punda lax í Ölfusá jafnast á við stórlax í litlum sprænum sem menn jafnvel borga stórfé fyrir að fá að komast í. Að draga inn smálax í Ölfusá getur tekið virkilega á og maður getur verið alveg úrvinda eftir að berjast við fisk í 5 mínútur og maður getur lítið leikið sér með fiskinn eins og maður getur gert í litlu ánum því þar hefur maður yfirhöndina á meðan fiskurinn er með yfirhöndina í Ölfusánni.

Það er svolítið undarlegt hvernig maður getur allt í einu orðið heltekinn af ákveðnum hlutum, hér áður fyrr hafði ég ekkert sérstakann áhuga á tónlist en fyrir c.a. ári síðan fór ég allt í einu að fá áhuga á að hlusta á tónlist og er jafnvel með tónlist í kringum mig allan daginn. Það sem mér þykir líka svolítið skondið er hvernig tónlistargerðin getur tekið miklum breytingum....fyrst var það bara e-h venjulegt eins og Ný dönsk, síðan kom þunga- og dauðarokk og allt í einu fékk ég ægilegt æði fyrir Sigur rós en núna eru það bara óperur sem ég hlusta á og er það aðallega Andrea Bocelli og mikið rosalega eru sum lögin sem hann syngur flott!

En læt þetta duga í bili og kem aftur fljótlega

Langt síðan síðast...!!

Sun, 23 Aug 2009 02:27:24 GMT

Jæja.....allt of langt er nú síðan ég bloggaði og vill ég kenna þessu Facebook æði um sem alla hefur gripið!! Maður getur ekki farið inn á Facebook án þess að rekast á sjötuga frænku sína úr Dölunum og er skyld manni í sjöunda ættlið! En það er nú allt gott og blessað.

Margt hefur gerst síðan síðast ég bloggaði, þá vorum við Ásdís ný búin að selja bílinn okkar og kosningar ekki búnar. En eins og ég segi, þá hefur margt gerst síðan síðast en þó get ég ekki notað frasann "margur lækurinn hefur runnið til sjávar" því flestir lækir og ár hafa verið þurr í sumar og engan veginn runnið til sjávar.
En svona það helsta sem við höfum gert af okkur er:

Ferðast hingað og þangað um landið, s.s. Skorradal, Vestfirði, Suðurland og fleiri staði sem ég man ekki í augnablikinu
Fárast yfir ástandinu í þjóðfélaginu
Fengið kosningar og nýja ríkisstjórn
Búinn að fara í hnéaðgerð þar sem krossbandið, liðþófinn og e-h meira var lagað
Farið að veiða nokkrum sinnum með misjöfnum árangri og mis góðum veiðifélögum (taki þeir til sín sem telja að ég sé að tala um sig, þá sér maður hver heldur að ég sé að tala um sig) :haha:
Fengið mjög gott veður, hita og sól og blíðu og smá regn (svona fyrir gróðurinn) og rok og ský og ég veit ekki hvað og hvað (það voru nokkur "OG" í þessu hjá mér)
Dúndur kveðju og afmælis partý um daginn hjá Ásdísi og var vel tekið á því og mikið stuð (vel tekið á því hjá sumum)
Margt fleira höfum við bardúsað og mega þeir sem við bardúsuðum það með ekki verða sárir eða móðgaðir þó ég telji það ekki upp hérna en þeir mega þó minna mig á hlutinn ;)

Í gær flutti hún Ásdís mín út til Svíþjóðar og byrjar skólinn hjá henni eftir helgi. Ég fer síðan til hennar sem fyrst og verðum við þá bæði búsett erlendis (hljómar geggjað flott :lol: )
Hún er að fara í KTH og er að klára masterinn í verkfræði og stefnum við á að búa þarna í c.a. 2-3 ár og koma síðan KANNSKI heim til Íslands ef ástandið verður orðið betra og e-h vinnu að fá fyrir okkur. Þó hún sé ekki búin að vera lengi úti, þá er maður strax farinn að sakna hennar (frekar væmið og ólíkt mér að segja þetta, en svona er þetta nú bara) og ég get varla beðið eftir að fara til hennar. Ég get ekki sagt annað en að ég sé stoltur af stelpunni minni, að skella sér út í stað þess að vera að draga þetta eitthvað....því þá hefði þetta kannski aldrei gerst og við bara alltaf verið hérna heima á Íslandi og jafnvel ekki klárað námið okkar. Síðan hefur þetta verið draumur hjá okkur lengi, þ.e. að prófa að búa erlendis og læra nýtt tungumál. Kannski er Svíþjóð ekki góður staður, þar sem þetta er mekka munntóbaks og ég hættur að taka í vörina!! :$

En svona fyrir forvitna...þá er bara allt hið fínasta að frétta af mér og þessi veikinda vitleysa fer vonandi bara að verða búin. Ég get amk fullyrt það að ég er mun betri en ég hef verið síðan þetta byrjaði allt saman þarna um árið og ætla ég að leyfa mér að segjast vera sprækur sem lækur (amk meira vatn í mér en þeim ;) )

En ætli ég hafi þetta nokkuð lengra í kvöld kveð í bili. Endilega kvitta fyrir komuna í comment dálkinn og þá sé ég að e-h sé að lesa þetta....og kannski líka hver er að lesa þetta :lol:

Búin að selja bílinn..... :)

Wed, 11 Mar 2009 09:39:38 GMT

Jæja...núna eru hlutirnir heldur betur farnir að gerast :lol: . Við Ásdís höfum lengi verið að spá í að selja bílinn, helvítis Opel drusluna, og létum nú loksins verða af því að auglýsa hana og höfðum við frétt af því að margt væri hægt að selja á barnalandi.is. Jæja, ég fór út með myndavélina að vopni á sunnudaginn í skítakulda og myndaði bílinn í bak og fyrir og tók svona mesta draslið úr honum áður en ég tók myndir inni í bíl. Smá tafir urðu á því að ég setti inn auglýsinguna þannig að hún fór ekki inn á barnaland fyrr en á mánudaginn. Eftir um klukkustund var fyrsti "viðskiptavinurinn" búinn að hringja og spyrjast fyrir um "kaggann" og þegar kvöldið var liðið, höfðu 4 haft samband og spurt um bílinn.
Það eru undarlegir hlutir sem fólk er að höndla með þarna því einn var alveg æstur í að láta okkur hafa málverk + smá pening fyrir bílinn og hann virtist ekki skilja það að við vildum ekkert málverk sem hann hafði sjálfsagt verðmetið sjálfur og var það að hans sögn 200.000 kr virði! Ég sagði alltaf við hann að við hefðum ekki áhuga á málverki, hefðum ekki pláss fyrir það og einnig að við værum að spá í að flytja út í haust og þá þyrftum við að fara að finna geymslupláss fyrir verkið. Þá var svarið frá honum "foreldrar geyma hluti" og það hreinlega virtist ekki komast inn hjá honum að við vildum ekki málverk. En hvað um það, við seldum bílinn á mánudagskvöldið og gengum við svo formlega frá þessu í gærkvöldi og sótti maðurinn bílinn og vorum við afskaplega fegin að vera laus við hann (bílinn).
Við tókum bíl á leigu hjá henni Unni Maríu og verðum við með hann e-h fram á sumar eða haust, þannig að við erum ekki bíllaus eins og við vorum búin að vera lengi þar sem Opelinn stóð bara í hlaðinu hjá okkur bilaður.

Það virðist vera algengt hjá fólki að eiga erfitt með að vakna á morgnana. Þetta er ekki bara á mínu heimili eða öðrum sem ég þekki til á. Nágranni okkar hérna fyrir ofan á líka MJÖG erfitt með að vakna og heyri ég í vekjaraklukkunni hans iðulega á morgnana og er hann/hún ekkert að flýta sér að slökkva á henni. Þetta er e-h svona hátíðnivekjaraklukka sem gefur alveg ægilegt hljóð frá sér og heyrist það vel niður í okkar íbúð og verður maður ansi þreyttur í eyrunum af þessu hljóði. Fyrst þegar ég heyrði það, þá hélt ég að þetta væri reykskynjari en nú er ég nokkuð viss um að þetta sé vekjaraklukka þar sem þetta hljóð heyrist á hverjum morgni.

En eftir fyrstu talningu á skoðanakönnuninni, þá eiga Auðir meirihluta þingsæta eða 58%, Sjálfstæðismenn eiga 25% og Samfylking og vinstri grænir 8% þannig að það verður fremur fámennt á alþingi eftir næstu kosningar ef þessi auðu sæti verða látin verða auð. En þó þetta eigi að vera "leynileg" kosning, þá verð ég bara að spyrja hvaða bjáni kaus Vinstri-Græna??

En læt þetta duga í bili

Margt að gerast....

Mon, 09 Mar 2009 14:37:10 GMT

Jæja...þá kom loksins að því, Ingibjörg Sólrún er hætt. Það er kannski ljótt að segja þetta en þarna var hún að nýta sér veikindin til að geta hætt því fyrir viku síðan sagðist hún ekki ætla að láta veikindin stoppa sig og halda ótrauð áfram en eftir skoðanakannanir síðastliðna viku þar sem um 50% flokksmanna vildu hvorki hana eða Jón Baldvin, þá kannski kveikti á e-h ljósum hjá henni og hún sá það að flokkurinn var ekki á bak við hana og tók hún þá þessa ákvörðun og "gagnaðist" henni að vera veik, þó ljótt sé kannski að segja það.

En annars hefur ýmislegt verið að gerast upp á síðkastið síðan ég bloggaði síðast.

Ekkert eldgos hefur komið, en reyndar var ansi góður jarðskjálfti milli Grænlands og Svalbarða og var hann upp á 6,4 á Ricter.
Ég og Ásdís fórum í fimmtugsafmæli til Heiðu frænku, en hélt hún það hérna í bænum og var heilmikið stuð þar og góðar veitingar einnig. Menn tóku vel á því sumir en ég hélt mig bara í sódavatninu og vatni.
Einnig fór ég og Ásdís í afmæli til Guðrúnar Ástu og var þemað þar hollar veitingar og var mikið af ávöxtum og grænmeti (PAPRIKA) var þar einnig en ég sleppti henni bara. Einnig var þarna reyktur lax og súkkulaðikaka sem ég að sjálfsögðu skellti í mig.
Ég hef einnig verið að fara í sjúkraþjálfun að reyna að koma mér í smá form og einnig að byggja upp löppina fyrir næstu hnéaðgerð sem ég vona að fara bara að fara að koma svo veiðisumrið verði ekki ónýtt 8| . Það yrði nú ljóta vitleysan ef ég gæti ekki veitt í sumar út af hnénu þegar ég er búinn að vera að bíða eftir því að komast að veiða, eiginlega síðan ég gekk frá veiðidótinu í haust! Ég varð afskaplega ánægður þegar ég var búinn hjá Jónda sjúkraþjálfara síðast því hann sagði að það væru þó nokkrar framfarir á hnénu síðan síðast því ég get beygt það mun meira, það er orðið sterkara og síðast en ekki síst....."dropinn" er farinn að sjást. Það er e-h vöðvi sem vaxtaræktarmenn kalla "dropann" en hann vantaði eiginlega hjá mér en núna er hann farinn að sjást og er það bara gott.

Það voru smá vonbrigði hérna hjá mér í gær að sjá það að vonda veðrið myndi ekki ná hingað í borgina. Það var óveður rétt norðan við okkur og síðan allt ófært fyrir norðan, stórhríð og óveður víða og heilmikil ofankoma. Það væri nú gaman að fara að fá eins og eitt svona veður hingað í borgina og sjá hvernig reykvíkingar höndla smá snjó ;)

Ég reikna með því að flestir kannist við það sem ég ætla að skrifa næst....finnst fólki ekki óþolandi þegar það fer í hvítu flíkina sína, sest í rólegheitum niður í sófann eða skrifborðsstólinn. Tekur upp heitann kaffibolla, finnur unaðslega kaffilyktina, allt fer af stað, bragðlaukar og ég veit ekki hvað og hvað en þá HELLIR MAÐUR YFIR SIG og fína, hreina, hvíta flíkin er orðin skítug!! Ég lenti í þessu núna rétt áðan :( en þá er gott að eiga góða þvottavél ;)

Ég setti inn hérna litla skoðanakönnun og ætti hún að vera hérna vinstra megin á skjánum, fyrir neðan klukkuna og hvet ég fólk eindregið til að taka þátt í henni. En ég læt þetta duga í bili.

Steypa og rugl

Mon, 02 Mar 2009 11:26:28 GMT

Jæja jæja....enn heldur vitleysan áfram hérna á Íslandi og lítið virðist vera að gerast og þingmenn margir hverjir komnir í kosningabaráttu fyrir prófkjörin í stað þess að vera að laga vandann sem blasir við mörgum! Annað sem mér þykir undarlegt, það er þessi valdasýki hjá Ingibjörgu Sólrúnu og vantraust sem hún hefur sýnt sínum samflokksmönnum og vill ekki stíga niður af sínum palli, sjálfsagt af ótta við að e-h sem henni er ekki þóknanlegur taki við stjórnartaumunum. Lengi hefur Samfylkingin talað um að hún sé flokkur sem vill jafnrétti og víða er flokkurinn með svokallaða fléttulista en þeir virka þannig að ef karl er í efsta sæti, þá er kona í öðru sæti og næst karl í þriðja sæti og koll af kolli.
Þegar ég horfði á fréttirnar um daginn, þá fannst mér svolítið undarlegt að sjá hvernig Samfylkingin ætlar fram hér í Reykjavík, en Jóhanna og Ingibjörg ætla að taka fyrsta og annað sætið en greyið hann Össur verður að sætta sig við þriðja sætið, þetta þykir mér ekki mikið jafnrétti miðað við miklar yfirlýsingar á köflum og spurning hvort Samfylkingin sé að verða hinn nýji kvennalisti?
Samkvæmt e-h skoðanakönnun sem ég sá, held ég á Stöð 2, þá vilja einungis um 16% flokksmanna Ingibjörgu áfram sem leiðtoga, um 12 % Jón Baldin en um 70% Jóhönnu.

Jóhönnu og félögum tókst loksins að "hreinsa" til í Seðlabankanum eftir miklar tilraunir en henni tókst ekki betur til við það að þegar hún setti/skipaði nýja Seðlabankastjórann, þá gerði hún það hugsanlega ólöglega þar sem ekki má skipa/setja útlending sem embættismann nema hann sé íslenskur ríkisborgari sem þessi nýji norski seðlabankastjóri er ekki!
Eitt af því fyrsta sem kemur síðan frá Seðlabankanum eftir að nýji bankastjórinn byrjaði er að ekki skuli aflétta gjaldeyrishöftum, var það ekki það sama og fyrri stjórn Seðlabankans sagði á meðan allir þessir fræðimenn og "snillingar" úti í bæ töldu það vera tóma steypu hjá fyrri stjórn Seðlabankans að aflétta ekki þessum gjaldeyrishöftum! Var þá fyrri stjórn Seðlabankans með rétt fyrir sér eftir allt saman og þessi nýji seðlabankastjóri kannski fer bara eftir þeim áætlunum sem búið var að vinna hjá Seðlabankanum og átti að fara eftir?

En aðeins um fjölmiðlalög.....árið 2004 ákvað Ólafur Ragnar að staðfesta ekki fjölmiðlalögin því þau honum, ásamt stjórnarandstöðu sem þá var, þótti ekki rétt að setja lög um fjölmiðla því fjölmiðlar ættu að vera frjálsir og öflugir miðlar sem myndu koma með réttar og sannar fréttir, lausir við ritskoðun og ég veit ekki hvað og hvað! Jæja, hann staðfesti ekki þessi lög sem hann hefði kannski átt að gera því megnið af fjölmiðlum landsins komust í hendur sama manns og tel ég öruggt að þær fréttir sem fluttar voru á hans fjölmiðlum voru ekki hlutlausar eða lausar við ritskoðun! En nóg um þessi "gömlu" lög sem ekki voru samþykkt vegna ítaka peningamanna á forsetanum og fleirum.
Mér þykir það skjóta svolítið skökku við að þingmaður eins flokks sem þá var í stjórnarandstöðu en er kominn í stjórn núna, vill fá fjölmiðlalög núna. Ekki veit ég hvort þessi þingmaður hafi verið á alþingi þá, en hvað með það. Hann vill amk fá fjölmiðlalög núna vegna kaupa útgerðamanna á Morgunnblaðinu og óttast hann að einungis muni sjónarmið þeirra heyrast núna á síðum Morgunnblaðsins! Já, núna vill þingmaður Samfylkingarinnar fá fjölmiðlalög því menn sem hann er ekki ánægður með, voru að kaupa fjölmiðil!

En aðeins um þessi SVÍN sem stjórnuðu bönkunum, en ég sá frétt á Stöð 2 um daginn þar sem fjallað var um kaup Hreiðars Márs Sigurðssonar og Sigurðar Einarssonar á hlutabréfum í Kaupþingi. Núna lítur út fyrir að Kaupþing þurfi að afskrifa um 15 milljarða vegna þessara kaupa! Sigurður tók sjálfur ákvörðun, ásamt stjórn gamla Kaupþings að aflétta persónulegri ábyrgð á láninu á meðan Hreiðar Már stofnaði einkahlutafélag og fékk lán út á félagið til að kaupa hlutabréf í bankanum! En fyrst þeir græddu ekki á þessu, þá tekur bankinn á sig tapið! Það er spurning hvað hefði gerst ef e-h gróði hefði orðið á þessu hjá þeim, hver hefði fengið hann í vasann?
Ég horfði í gærkvöldi á heimildarmynd um Enron og ég gat ekki komist hjá því að hugsa um þessa gríðarlega "kláru" menn hjá Íslensku bönkunum og einnig þessa "kláru" útrásarvíkinga og hvernig þeir gátu búið til peninga úr loftinu einu saman eins og menn gerðu hjá Enron.

En svona aðeins til að setja þessar upphæðir í samhengi við e-h sem hefur verið í umræðunni því maður eiginlega skilur varla þessar upphæðir sem verið er að tala um....15 milljarðar, þá var niðurskurðurinn í heilbrigðiskerfinu um 2,6 milljarðar og Björgólfur gamli var að fá tilboð í West Ham og var það tilboð upp á 15 milljarða (90 milljónir punda)! Þannig að þegar Kaupþing afskrifar þessa 15 milljarða, þá er það í raun að henda heilu knattspyrnuliði á Englandi eða rúmlega 5sinnum niðurskurðinum/sparnaðinum sem á að ná fram í heilbrigðiskerfinu! Þetta er engan veginn í lagi

En núna aðeins að öðrum málum......ég er byrjaður í sjúkraþjálfun, svona til að koma mér í smá form en einnig til að byggja upp hnéð eftir aðgerðina sem ég fór í um daginn og einnig til að byggja hana upp fyrir næstu aðgerð sem ég fer í. Þetta hefur bara gengið ágætlega en ég fékk reyndar e-h kvefskít sem tafði þetta aðeins en það er allt orðið gott núna.
Annars hefur hitt og þetta verið að gerast upp á síðkastið eins og Þorrablót á Selfossi, afmæli hjá Guðmundi litla frænda, rólegheitarkvöld heima með Ásdísi og að lokum, Jarðskjálftar í Vatnajökli :d Það væri nú ekki leiðinlegt að fá gott gos bráðlega, reyndar væri skemmtilegra að fá gos annarsstaðar en undir jökli því það er frekar erfitt að komast að þeim gosum, nema kannski í flugvél en þar sem ég á ekki flugvél og hef engan auðveldan aðgang að flugvél til að fara með mig í flugferð, þá kysi ég heldur gos sem væri ekki undir jökli :lol:

En ætli ég láti þetta ekki duga í bili þar sem þetta er orðið allt of langt hjá mér og bið bara að heilsa í bili

Hitt og þetta......

Thu, 12 Feb 2009 11:28:58 GMT

Jæja...þá er ég aftur mættur til bloggheima og hef svo sem ekki frá svo miklu að segja þar sem ekki er neitt sérstaklega mikið að frétta 8|
En svona það helsta sem ég hef verið að bardúsa frá síðasta bloggi er:

Horft mikið á Alþingi og furðað mig á mörgu sem þar hefur farið fram og þá sérstaklega hversu margt tilgangslaust er verið að ræða þar þessa dagana og lítið sem kemur að því að "bjarga" Íslandi eins og Samfylking og Vinstri Grænir ætluðu að gera
Fór til Bigga að hnýta flugur en þar voru Birkir, Toni og ég og hefði verið gaman að vera með upptökutæki og hlusta á umræðurnar seinna og jafnvel leyfa e-h að heyra það sem talað var um og þau orð sem sögð voru og sjá hvað þeim aðila dytti í hug þegar hann heyrði þetta allt saman og hefði ekki hugmynd um hvað við vorum að gera 8|
Fór í afmæli til Róberts Skúla með Ásdísi og fleirum (það voru að sjálfsögðu fleiri en ég og Ásdís í afmælinu) og fengum við ljúffengar kökur og ýmislegt góðgæti þar

En það sem er svona helst að frétta af mér núna er það að ég er kominn með RASSGATIS skít í hálsinn og var meira að segja kominn með alveg eina kommu í gær :s en ég stefni á að rífa þetta úr mér sem fyrst. Ég hef fílað mig sem hálfgerðan seiðkarl síðan í gær því ég er alltaf að sjóða mér seiði úr engiferrót og hunangi :$

En annars er löppin á mér ágæt eftir aðgerðina sem ég fór í um daginn, kannski fyrir utan stóra kúlu sem stendur út úr hnénu þar sem skrúfan var tekin og saumarnir eru :s en ég er sem betur fer að fara til læknisins á morgunn og þá getur hann sagt mér hvort þetta sé í lagi eða ekki.

En ætli ég láti þetta ekki duga í bili og skelli hérna inn mynd sem hægt er að nálgast HÉR en tek fram að þessi mynd er ekki ætluð börnum þar sem innihald hennar er frekar dónalegt og sýnir þau tök sem ákveðinn stjórnmálaflokkur hefur á forseta vorum 8|

Jæja jæja...

Wed, 04 Feb 2009 11:20:47 GMT

Ég verð að viðurkenna eitt og ég reikna með því að margir séu sammála mér með það...ég hef ekki verið nógu duglegur að skrifa hérna inn en ég skal reyna að bæta úr því og vera duglegri, en ég ætla nú samt ekki að lofa neinu.
Það svona sem er helst að frétta af mér er að fyrstu lyfjabreytingu ársins er lokið og vona ég að hún hafi heppnast vel, en allur janúar fór í hana og orsakaði hún stærri flog en voru að koma í kringum áramótin og e-h tímabil þar á undan. Nú er bara það næsta að leyfa hinum lyfjunum að komast í jafnvægi og sjá hvernig þetta heppnaðist.

Í gærmorgunn fór ég svo í létta hnéaðgerð þar sem hnéð var speglað, það sem skemmt var skorið og skafið út en einnig var tekin skrúfa úr sköflungnum og sagði læknirinn að það hafi verið svolítið vesen að komast að henni og þurfti hann að brjóta svolítið og hamast til að ná henni. Ég sé hann alveg fyrir mér með meitil og hamar, vera að hamast á löppinni til að komast að skrúfunni því beinið hafði vaxið yfir hana.
Ég hugsa að ef hann hefði ekki tekið skrúfuna, þá hefði þessi aðgerð verði nánast verkjalaus en djöfull var ég að drepast í löppinni í gær og rifjuðust upp minningar frá krossbandaaðgerðinni sem ég fór í árið 2000. En það þýðir ekkert að væla yfir þessu því nú er ég bara að byggja upp "nýjan" Sigurjón og á ég bara eftir að fara í eina hnéaðgerð til viðbótar og vona ég að hnéð verði þá orðið nánast eins og nýtt en ég fer í hana eftir um 4-6 vikur og búa þeir þá til nýtt fremra krossband og strekkja á aftara krossbandinu og reikna ég þess vegna með því að vera orðinn fær í flestan sjó í sumar. Það verður ekki amalegt að vera kominn með "nýtt" hné og vel starfhæfan heila :lol:

Hér má sjá skrúfuna sem var tekin úr og kom það mér á óvart hversu stór hún er!! Ég hafði símann minn með sem viðmiðun og bendi bara á að þetta er ekki svona dvergasími eins og margir eiga, heldur er þetta stór samlokusími ;)

En hérna eru einnig nokkrar myndir sem ég tók í blíðunni á Eyrarbakka í smá bíltúr sem ég fór í með pabba og skelltum við okkur í fjöruna

Horft til vesturs af bryggjunni	Sandöldur í fjörunni
Hestamenn riðu greitt í fjörunni	Sólin skein skært

Hægt er að smella á myndirnar til að fá þær stærri.

En ætli ég láti þetta ekki duga í bili og ætla að reyna að vera duglegri við að skrifa hérna inn 8|